البلد بلدك
واقف عم أتأمل الاعلان الكبير يلي بالشارع ويلي مكتوب عليه بالخط العريض:
البلد بلدك
دمعت عيني
وانا عم اقراها بصوت عبدالرحمن ال رشي او بصوت منى واصف.
اديش هالجملة عميقة ومؤثرة ..؟
اديش فيها معاني وابعاد ومفردات مبطنة ؟
جملة رائعة...
قوية وحنونة...
يا اخي فعلا يلي اخترع هالاعلان واحد وطني بامتياز...
مر بجنبي
رجال كبير بالعمر معه كيس بندورة وكيس بطاطا...
قال لي:
شبك عم تطلع عالاعلان وكأنك عم تشوف شي شغلة عظيمة ..؟
قلت له: شايف هالاعلان يا عمو...
كلمتين متل بعض بتخليك تحس ان البلد بحاجتك...
والبلد بلدك
ضحك الرجال الكبير وقال لي:
لما بتروح على شي محل وبتشتري منه اغراض وبيخورفك وبيخوزقك بالاسعار...
شو بيقول لك بالاخير ؟
فكرت و فكرت و قلت له:
بيبقى مبتسم وعم يقلي المحل محلك...
قال لي الرجال:
يا عيني عليك ..
وجملة البلد بلدك
نفس الشي تماما ..
شلون بدهم يسترزقوا اذا رحت وسافرت؟
انت زبون مهم...
فالموضوع موضوع تجارة...
والتجارة بدها زبونات...
و الزبونات هنن نحنا...
قلت له:
ايوااااا .. مزبوط..
وسألتو دخلك:
بأديش اشتريت البطاطا والبندورة ؟
قال لي:
البندورة ب٤٠٠ و البطاطا ب٥٠٠
و ١٠٠ اهلين وسهلين
والمحل محلك...
قلتلو :
والبلد بلدك
وضحكنا ضحك طفلين معا...
واجت سيارة مسرعة كانت بدها تطحشنا وتطيرنا....!!!
فعدونا فسبقنا ظلنا ..
قبل ما ناكل هوااااا
وسوم: العدد 821