زجلية الثورة السورية
باللهجة العامية
جمعة (سلاحنا للجبهات، لا للمناطق المحررة)
طريف يوسف آغا
سـورِيَةْ أرضِ الأمجـادْ
شَـعبّا والله مابيِنـذَلْ
شَـعبّا كُلّـو مِنِ الأسـيادْ
كِلْ مينْ ظالِـمْ فيها فَـلْ
حَكمِتهـا شِـلّةْ أوغـادْ
بِدنا نشـيلا مالا حَـلْ
ورَح تِرجَع كِلاّ أعيـادْ
العيدِ السـوري والله هَـلْ
***
سـورِيَةْ أرضِ الأمجـادْ
فيها حِمْصِ العَدِيّـةْ
وفيها دَرعـا أمّ الثَـورَةْ
وفيها حَمـا الأبِيّـةْ
وأهـلِ الرقَّـةْ هالشِـجعانْ
والأحـرارِ الديرِيّـةْ
حَيِّ حَـلَبْ أمّ الأبطـالْ
وحَيِّ الرجـالْ الشـامِيّـةْ
***
فيها حَطّـو حِزبِ البَعثْ
وآلو حِزِبْ سِـياسـيْ
لَمّـو فيـهْ هالزِعـران
وكِلْ مينْ آلْ (على راسـيْ)
ولَمّـو فيـهْ الحرامِيّـةْ
وكِلْ مينْ عَئْـلو تَيّاسـيْ
عمْلـو مِنُنْ زُعمـاءْ
وهِنّـنْ رِجليـنْ كَراسـيْ
***
وفيها شِـلّةْ مِنتِفعيـنْ
سَـمّو حالُـنْ قَومِييـنْ
مافيهُـنْ جنسِ الأخـلاءْ
مافيهُـنْ مِنهـا ذَرّةْ
تَخبّو خَلفِ الشِـعاراتْ
وهِنّـنْ ألبُـنْ مَع بَـرّا
لَمّا منِخلَع هالنِظـامْ
رَح نِكسِـر خَلفُنْ جَـرّةْ
***
وفيها تريسـةْ شَـبّيحةْ
سَـمّو حالُـنْ فَنّانيـنْ
ومَعهُـنْ نِتفـةْ نَبّيحَـةْ
عَلْ إِعـلامْ مَحسـوبيـنْ
كتير عليهُـنْ نَطّيحَـةْ
كتير عليهُـنْ جَربانيـنْ
لَمّا بيصلِ الجيشِ الحُـر
راحِ يفِـلّو هَربانيـنْ
***
شَـرءُ وغَربُ وإسـرائيلْ
مابيسْـتَغنو عَـنْ بَشـار
كُلّـو مشـانِ الجـولانْ
كُلّـو بدو هالجَـزار
الشَـعبِ السـوري مابيِنهـانْ
الشَـعبِ السـوري غضِبْ وثـار
راحَ يسَـئّطْ هالنِظـامْ
مَهمـا طـالَ الزَمـانْ
***
سـورِيَةْ أرضِ الأمجـادْ
شَـعبّا والله مابيِنـذَلْ
شَـعبّا كُلّـو مِنِ الأسـيادْ
كِلْ مينْ ظالِـمْ فيها فَـلْ
حَكمِتهـا شِـلّةْ أوغـادْ
بِدنا نشـيلا مالا حَـلْ
ورَح تِرجَع كِلاّ أعيـادْ
العيدِ السـوري والله هَـلْ
