فارس الرحلة بصحيح
فارس الرحلة بصحيح
عبد القادر أمين عبد القادر- طنطا
عضو اتحاد كتاب مصر
عاشق ومعشوق فـ السما
داير مع الأفلاك ...
خطوة تقرب مننا والتانية بتضمك هناك
يا فارس الرحلة بصحيح ... طوق النجاة
لحظة سقوطك يا بطل معناها موت
لكن رجولك لما وقفت فـ الطريق خلف النبى
واتسمرت ...كانت حياة
مش غريب إنك تحبه ... تصدقه
ولا شيئ غريب إنك فرس وبتعشقه
لكن العجيب إن صاحبك رافض النور فـ الضلام
بيمد إيده يضربك تحت الحزام
إلحق قوام
فتقول له : لأ .
يرجع يحاول يرفسك
تحرن ورافض يا فرس تنزق
يآدى الكسوف
الراس مع الرجلين صفوف
ولسانك اللى بدون حروف
بيقول له : شوف
هوه انت يا " سراقة " صبى ؟!!
وعيونك اللى مفتحين عميانة مش شايفة النبى !
لو كنت مش عارف تسوق
يبقى انت حقك تتركب
خلينى فوق ضهرك
انزل وسلم يا بطل ... ده الأمر مش أمرك
سبنى أقرب له
أحكى أفضفض له
أنا مش لوحدى يا نبى
ده العنكبوت على مذهبى
سادد بيبان الشر فى وش الطغاة
أسلاكه شايكة مؤمنة ... صنع الإله
أهبل هبل ... دلوقتى متنصح
آل يعنى بيفكر
لو كان دخل كانت خيوط العنكبوت لازم هتتقطع
برضه غبى ... والعقل مش عنده
ده اللى خلق فـ العنكبوت الضعف فـ خيوطه
هوه نفسه اللى خلق القوة فى قلبه
يا أمة عايشة الحدث
هوه انت جوه الغار والا انت من بره ؟!!
واللا انت راكبة الفرس بتحاولى ميت مرة ؟!
السكة مش من هنا ... يا حلوة ... يا مرة
طول عمرنا فـ الغار وانتى على بابه
واقفه مع التجار صاحية إذا ناموا حاضره إذا غابوا
مين اللى جمد دمنا يا غالية فـ عروقك
مش برضه من صلبنا واقفة على عودك ؟
لمى جرادك وارجعى
أو وسعى .... أصل احنا هنعدى
من غير ما هنهدى
من غير وداعك يا قمر أصل احنا يوم راجعين
هيه كده ... كل البذور الطيبة طول عشقها للطين
بتمد وتجدر ... من غير ما تتغير
صاحبك زمان وقت النبى فارس كما الأعلام
دلوقتى كل الاحصنة واقفة ورا ... هوه الوحيد قدام
عاشق ومعشوقك أنا مفرود على ضهرك
عينى على حلمنا ... قلبى على قلبك
ياريت يا مهرة تكبرى ونطير على مهلك
وتكونى ذكرى للفرس ونكمل الهجرة
يا إما اقولك يا بلد عندى بقى فكرة
نوصل سجل البلد أو نطلب التغيير
اسم الفرس نشطبه
ننده نقول يا حمير
وده مش كتير
