زوبَعَه

زوبَعَه

سيمون عيلوطي

هَالزّوبعه الْ هَبّت عَ غَفلِه....

كَسّرت جِسْر التّلاقي

مع تَفاعيل الزّمن،..

جَرّفت روح الصّحارى

عَ الجّنايِن...

وِالمسارِح وِالطّرَب،..

صارت السّاعات تُكرُج لَ وَرا

تِفْتَح سْواق العبيد..

وِالجّواري بِالمَزاد،..

حالِة سَواد..

خيّمَت وِالجّْهِل عاد!!

***

أجسام سودا مْقنّعه..

فِلْتَت بِليلِه غيّرَت شِكْل القمر

صَحّرَت وَهْج العُقول

وِالحُقول

وِالبداوي وِالحَضَر،..

راجَت صور..

شو شِنعَه، عنها مَ انْحكى

لا بِرجْفات الرّعُب..

لا بِالبُكا..

حَيّات تِطْلَع من تَجاعيد الوَطا*

شي صفرا، شي زرقا

ومنها مْرَقّطَه...،

شو يْروج فِكْر الهَرْطَقه

يِنْخِفِض كَرّ الكَنار...،

وِيْموت زِزّ الزّنْبَقه!!

------

الناصرة:27-9-2014

------

*الوَطا: الأرض