توبة نصوحة
سهرة تلفزيونية
محسن الخزندار
"عمل اجتماعي يعالج مشكلة الإدمان "
"على المخدرات"
أسماء المشاركين يظهر كل اسم على حده على الشاشة:
1. أبو توفيق
2. إم توفيق
3. توفيق
4. صباح
5. محمد
6. فاطمة
7. طلعت
8. أبو سليم
9. أبو غازي
10. رجال مكافحة المخدرات
11. وكيل النيابة
مشهد داخلي نهاراً في الصباح :-
{ غرفة في بيت متواضع وعلى مرتبة قديمة يجلس "أبو توفيق" تحت يده مسندان وأمامه شيشة، يسحب أبو توفيق نفساً بانسجام الشيشة تصدر صوتاً.
أبو توفيق : ينادي يا بنت ... يا بنت.... إن شاء الله طرش يطرشك مش سمعاني ؟
إم توفيق : أيوه ... أيوه .... أيوه ..... جايه .... إيش بدك ؟
أبو توفيق : أهلين بنادي عليكي ..... والله صبابا ... يعني مش شايفة انو الفحم خلص ... انجري حركي حالك يا بنت ... والك إلحقيني بفحمتين .
إم توفيق : يي ....يي..على الشيشة ويومها يوه والله ما أنا فاضيه إلا للشيشة
أبو توفيق: زنت بنت الحرام على خراب عشها... بدها أتطير الكيف إلي في راسي ساعتين واكتر بأرطب فيهم مخي ، وبنت الحرام بأقل من ثانية الله وكيلك طيرت كل إشي ... الله يلعن اليوم إلي شفت صباحك فيه .
إم توفيق: لا.... لا لالا من غير لعن ولا سب .... هيني إجيت
أبو توفيق : الله يلعن النسوان ..... الله يلعنهم مليون مرة ما بيجوا إلا بالعين الحمرا .
قطع "إم توفيق تذهب وهي تتمتم "
أبو توفيق : ايش بتقولي يا بنت ؟
إم توفيق: ولا حاجه والله ما قلت حاجه .
قطع تدخل ابنته صباح وعلى وجها علامات الغضب والانفعال .
صباح : صباح الخير يابا
أبو توفيق: صباح الأنوار... الله يكفينا شر صباحك ليش مكشرة ؟
صباح : يابا بدي أروح على المدرسة .... يابا
أبو توفيق: بدك تروحي المدرسة ؟
وليش... ما روحتيش على المدرسة من بدري ليش ؟
صباح : أنا يابا مدرستي مسائي
أبو توفيق : طيب روحي اتخيبي والله بتفكري حالك عدك غنمتيها
صباح : يابا أنا الأولي على المدرسة ... ولا إنت أنسيت ؟
قاطع على أبو توفيق وهو يردد ساخراً ... الأولي..الأولي..أكيد طالعة لأبوكي .
قاطع على صباح وهي تقول يابا
أبو توفيق : ماتخرسي عاد ايش بدك ، بدك تروحي عالمدرسة وإلا ما تروحي عنك ما روحتي .
صباح : بدي مصروف يابا
أبو توفيق: بدك مصروف يا بنت الكلب ؟
على الطلاق من إمك لو خبطيني في الحيط لارجعلك فاضي ولو دورتي في جيوبي والله ما مابتلاقي معي إلي يرن .
صباح يبدوا عليها ملامح الحزن والأسى
صباح : أوف ايش هادا يابا ؟
كنت يابا تعطيني مصروف كل يوم وبعدين قلت مصروف يوم بعد يوم ارضيت بعد هيك قلت كل أسبوع ورضيت والله يابا نفسي اشتري زى هالبنات .
أبو توفيق: من وين أجيب ما انتو عارفين لا شغله ولا مشغله
صباح : مليش دعوة .... بدي مصروف زى كل البنات ، بابا حرام عليك بكفي على إحراجي بين البنات في المدرسة لما بتيجي إدارة المدرسة وتسال مين يا بنات أبوها ما بيشتغلش " إلي أبوها ما بيشتغلش ترفع ايدها مرة بيعطوني مريول ومرة بيعطوني شنطة وأخر مرة أعطوني كانت سلة غذائية و صرة أواعي مستعملة .
أبو توفيق : هيه وايش يعني ؟ ... كأنهم جايبين الحاجة من دار أبوهم والا دافعين حاجة من جيوبهم .
صباح : يابا ايش منظري بين البنات والله أنا بدوب في أوعيا ومن عيون البنات لما تتطلع على .
أبو توفيق : والله انك هبله إيش بيجي منهم كسبة.
صباح: والله ما أنا رافعة أيدي بعد هيك أنا رايحة المدرسة أتعلم والا أشحت .
قطع على أبو توفيق يمسك بأيدو شي يحاول رميه على صباح
قطع على صباحا وهي تحاول الهرب من أمامه
أبو توفيق : صدق المثل إلي قال اقلب الجرة على تمها تطلع البنت لإمها ... الله يلعنك طالعة نكدية زى إمك .
أبو توفيق: يا إم توفيق وينك ؟ ... وينك
برتفع صوت أبو توفيق
وينك يا بنت ... وين الفحم إلي طلبتوا منك طلبت فحمة صرتي فحمة والله لو ابتصنعيه ايش هالوليه .
إم توفيق : إجيت يا أبو توفيق .. هيني اجيت .
أبو توفيق : والله ما أنا عارف ايش اسويلكم أنا مش ملاحق على طلباتكم.
إم توفيق : إنت .... بس بلاش ؟؟؟؟
أبو توفيق : أه أنا والا مش عاجبك ؟؟؟؟؟
إم توفيق : هو أنت هالايام بتطلع من الدار والا بتجيب اشي والا بتعطينا مصروف.
أبو توفيق: العمى في عينك... ايش قصدك آه .. بدك تعايريني بالاسورة إلي بعتيها عشان جابتها إلك إمك لما أجت من الحج ؟
إم توفيق: أبدا والله أبدا يا أبو توفيق ما قصدت
أبو توفيق: خلص طيب... خلص ... نقطيني بسكاتك
فترة صمت وسكوت
أبو توفيق: ألا قولي لي يا مرة... قديش ضايل معك مصاري ؟
قطع على{ إم توفيق وقد ارتسم على وجهها معالم الخوف والارتباك }
إم توفيق: ضايل معي عشرين دينار والله ما أنا عارفة يا أبو توفيق ايش بدها تكفي والا ايش علينا كهربا وميه وفش في الدار ولا حاجة بتتاكل .
أبو توفيق: أوعي... أوعي يا إم توفيق تنجني وتدفع زينا زى كل الناس ما في حد في البلد بيدفع لا كهربا ولا ميه .
إم توفيق : والله خايفه يقطعوا عنا الكهربا والميه .
أبو توفيق : يقطعوا الكهربا والميه يا وليه يا هبله جامعة الدول العربية دفعت عنا و أوروبا دفعت عنا وبيقولوا انو عادل إمام دفع فاتورة الكهربا .
إم توفيق : الله يستر من هالايام الجاية الأولاد بيكبروا والدنيا بتغلى ... الله يستر
أبو توفيق: هاتي... هاتي هالعشرين دينار وخليها على الله
إم توفيق : إيش أجيب ؟.. ما أنت اخدت العشرين دينار يلي قبلهم وما شفنا حاجة أجت على الدار.
أبو توفيق : شوفي يا وليه والله أنتي ناوية اطيري المخمخة يلي في راسي.
قطع في هذه الأثناء يدخل توفيق
توفيق: مالكم ؟ صوتكم جايب آخر الشارع فضحتونا
أبو توفيق : تعال يابا شوف إمك بتعايرني نسيت قديش كنت أنا بجيب مصاري وبحط في جيبها.
قطع على إم توفيق وهي تبكي بصوت منخفض
توفيق : عادي يالله كل يوم إحنا على هالموال من شان الله بيكفي .. قرفت حالي ..قرفت هالعمر قرفت العيشة.
قطع على أبو توفيق : شف ... شف ... والله كبرت واجا اليوم يلي بترفع فيه صوتك على أبوك .
مشهد داخلي نهاراً في الساعة التاسعة صباحاً
قطع على أبو توفيق : نايم على مرتبه وبجنبه الشيشة وبجواره على مرتبة أخرى تنام إم توفيق .
يعلو صوت سعال حاد شديد صادر من أبو توفيق والسعال يكاد يخنقه
مالك: سلامتك... مالك .مالك. .. يا أبو توفيق ؟
أبو توفيق : والله منا عارف إيش صار لي إلي مدة على هالحال
إم توفيق: كله من السجاير والشيشة والهباب إلي بتشربو الله يحرقهم ويحرق إلي صنعهم
قطع على أبو توفيق بتوتر وعصبية .
أبو توفيق : أيوه عاد خلصنا أصبحنا وأصبح الملك لله سكري هالبوز على هالصبح يا صباح يا عليم .
قطع على إم توفيق : خلص ...خلص ... سكرت تمي "وتضع يدها على تمها "
أبو توفيق : يالله اصطبحي جهزيلي لفطور ونظفي الشيشة خليني أخد نفس ، أخ على سيجارة على الصبح ...أولاد الحرام غلو النصف وعلوا السجاير و المعسل .
توفيق : صبح الخير يابا
أبو توفيق : ول صباح الخير يا توفيق من إمبارح وأنت لأوي بوزك من ساعة ما أخدت العشرين دينار ؟ صاحي إيش بتعمل من الصبح روح شوفلك شغله وحل عن وجهي .
توفيق : بدرس يابا ما إنت عارف توجيهي ودراسته .. امتحان توجيهي قرب ضايله شهر يادوب والله أنا خايف .
{بيفرك توفيق يديه بتوتر }
أبو توفيق : على إيش خايف ؟ وبإيش مهتم إيش ما تجيب بالتوجيهي جيب ، يعني إيش بدك إتسوي بالشهادة ؟؟ ما أنت عارف لا راح اقدر أوديك جامعة ولا راح اقدر أعملك حاجة .
قطع على توفيق بينظر إلي أبيه نظرة حيرة واستغراب "
بس يابا أنا شاطر كتير وكل الأساتذة بيقولوا انو ممكن أكون من الأوائل هادي السنة على القطاع ، وخالي طلعت وعدني انه بدو أيساعدني في الجامعة .
أبو توفيق :عاد كان أنا عارف من الأول أنت وإلا أختك صباح أكلتوا راسي ، أنت وأختك وإمك ... إمكم إمسكرة عليكم الغرفة وهاتك يا دح وهاتك يا قرايه .
قطع على أبو توفيق يوجه نظره إلي توفيق " عالعموم نسيتني إيش بدي منك
يضع أبو توفيق يديه على رأسه :
آه روح عند عمك أبو سليم هات أكم من بكيت معسل وأكم بكيت سجاير والمعلوم خايف يطلع سعر الدخان والمعسل ولا ينقطع
.
قطع على توفيق " توفيقا ينظر مستغرباً"
يابا بأكم هدا يلي بتحكي عليه حرام عليك ما في بالدار لقمة وأنت بدك بالعشرين دينار أتضيعهم على مزاجك.
قطع على أبو توفيق يمد أيده تحت المرتبة .
خد يا توفيق العشرين دينار إعطيهم لعمك أبو سليم وهو بيصبر علينا بالباقي
قطع على توفيق: بصوت منخفض حزين :
يابا حرام عليك لا أكل ولا شرب ولا لبس إحنا أولى بكل قرش يابا يلي يلزم البيت يحرم على الجامع .
أبو توفيق غاضباً : ولك إيش قصدك ؟؟
توفيق : يابا الدار بدها خضرا على الأقل مش طالبين لحمه
أبو توفيق: اسكت... اسكت ... إمك شاطرة بتدبر حالها
قطع على توفيق يقول بحسرة : بدك إمي تتداين
أبو توفيق : تتداين وايش عليها ما تتداين من أخوها و إلا من أهلها ... إيش يعني ؟ مهما أهلها مجبورين فيها.
توفيق مستغرباً: أهلها هم مجبورين فيها وانت يابا ؟
قطع على"أبو توفيق بيقول بتوتر وغضب وسخرية "
ما إنت شايف لا شغله ولا مشغلة والصحة على قد الحال وإلا يا دكتور توفيق بدك إشتغل في البطالة اكنس الشوارع وألم زبالة أمرك يا دكتور توفيق.
قطع على أبو توفيق غاضب يدور على شي وتوفيق واقف مذهول يمسك أبو توفيق راس الشيشة ويضرب بها توفيق وهو يشتم بدك أخر الزمن أشتغل زبال.
قطع على توفيق يصدرمنه صراخ بعدما أصيب رأسه ويقع على الأرض .
أبو توفيق: أخر الزمان ما ضل على إلا أنت وأختك وإمك كل واحد منكم بكلمه ولكم زهقت منكم عمري .
قطع على توفيق ينزف من رأسه وهو يبكي بحرقة وألم "
توفيق : الله يسامحك يابا ..... الله يسامحك يابا
قطع على إم توفيق تأتي مسرعة على صوت صرخة توفيق ، تجري على توفيق وتحتضنه وهي بتصرخ توفيق حبيبي إيش في مالك ياما .. تضع يدها على رأسه والدم يلطخ ملابس توفيق وملابسها.. تصرخ إم توفيق وقد ازدادت حيرتها وألمها .
قطع على أبو توفيق : يقف مذهولا لا ينطق بكلمة
توفيق: الله يسامحك يابا أنا ما قصدت أهينك ، رايح لأبو سليم أاجيبلك يلي طلبتوا
إم توفيق : والله حرام نصرف العشرين دينار: عالمعسل والسجاير والهباب والكلام الفاضي وإحنا نفسنا في وقية لحمة حتى لوكانت لحمة متلجة.
قطع على "إم توفيق تحتضن توفيق وهي تبكي "
مشهد داخلي على بيت أبوتوفيق بعد الظهر :
أبو توفيق: جبت الحاجات يا توفيق
توفيق : أعطاني أبو سليم الحاجات ورفض ياخد العشرين دينار وقالي أنا بتحاسب أنا وأبوك
أبو توفيق : هيك الأصحاب والا بلاش ، ولك يا إم توفيق شوفي لي حاجة حلوة أكلها أعمليلي أي إشي حلو .. انزلي على السوق وجيبي بالعشرين دينار خضرا ولحمة وفاكهه .
توفيق : يابا أبو سليم قالي انو بدو يشوفك ضروري .
أبو توفيق : إن شاء الله الليلة بعد العشا بروح عليه لسه الواحد رأسه ما عمرهوش على الصبح .
توفيق : الله يتوب عليك يابا من هالسم ويتوب علينا من هالهم .
أبو توفيق : ولا إيش بتقول مش سامع
توفيق : بقول يارب انجح في التوجيهي
أبو توفيق : يالله روح أتخيب أنت وأختك ادرسوا زى ما بتقول إمكم انفعوا حالكم
إم توفيق : أبو توفيق أنا رايحة عالسوق بالله عليك طول روحك على الأولاد
أبو توفيق : بس ما تنسي تجيبي معك فحم وما عليكي راح ترجعي وتلاقي أولادك بيدحوا قراية بدل ما يتعلموا إشي ينفعهم ... ابنك وبنتك اعقولهم طقت من كتر قرك عليهم .
مشهد داخلي ليلاً بعد الساعة الثانية عشر
قطع صوت طرقات على الباب وأبو توفيق وإم توفيق لم يناما بعد من شدة الحر
إم توفيق:تسمع صوت خبط على الباب
قطع على أبو توفيق .. أبو توفيق على مرتبه وهو نص عاري يا إم توفيق في حدا على الباب بيدق .
إم توفيق : يا أبو توفيق شوف مين إلي على الباب بيخبط
قطع على أبو توفيق : يفتح الباب ويفاجأ برجال المكافحة على الباب ويدخلون البيت .
إم توفيق : إيش بدكم ... مين انتو إلي جايين في نص الليل
رجل المكافحة : اسكتي يا وليه وما تدخلي في أشي ما إلك فيه
إم توفيق : بجوز من الله أنكم تيجوا في نص الليل ترعبونا وترعبوا لاولاد لصغار
رجل المكافحة: استري حالك يا وليه وحطي إشي على شعرك، معنا إذن نيابة ابعدي عن الطريق هي إذن نيابة .
مسئول المكافحة الثاني : يلتفت حوله على رجال المكافحة ويأمرهم بتفتيش البيت وكذلك يطلب من أبو توفيق جواله والحافظة الخاصة به وأن يدور وجهه على الحائط ولا يكلم أحد .
قطع على أبو توفيق وجهه مصفر والدم هارب من منه وغير قادر على الكلام "
حركة سريعة لرجال المكافحة في البيت من قلب المراتب وتفتيش الدولاب وتفتيش المطبخ والحمام .
قطع على احد رجال المكافحة : يجد خلف صورة قديمة معلقة على الحائط قطعة حشيش صغيرة .
رجل المكافحة : وجدنا قطعة حشيش يا سيدي
مسئول المكافحة : يا أبو توفيق إحنا جايين ومتأكدين إنو في عندك حشيش وعارفين من مين اشتريتها والله ووقعت يا بطل وما حد سمى عليك .
مسئول المكافحة : إتفضل معنا يا أبو توفيق
إم توفيق : ألف مرة حذرتك يا أبو توفيق من المشي في هذا الطريق الله يقف معك
*** مشهد في قسم الشرطة ***
مسئول المكافحة : اختصر الطريق من الأول يا أبو توفيق وقولنا من مين بتشتري ومين بيحشش معك وشرف الإسلام إن سمعت كلامي لطلعك من القصة زى الشعرة من العجين وإنت يا أبو توفيق لا تبع ضرب ولا بهدله ومعلومات عنك كتيرة بلاش تكبر راسك أنا بقدر أحولك لأكثر من جهة أمنية وأنت ابن ناس ساعد نفسك وساعد الحكومة
أبو توفيق : أنا بعرفش إشي عن هادي يلي إمسكتوها ولا عمري حششت ولا عندي خبرعن إيش بتحكوا
مسئول المكافحة : أبو توفيق أنا لهلوقت محترمك إنت لابس القضية لابسها لو اعترفت ومشيت معايا بالتحقيق ممكن أطلعك منها .
قطع "صفعة على وجه أبو توفيق من مسئول التحقيق وبداية الركل والضرب من رجال المكافحة وبعد ثلاث أيام من التحقيق مع أبو توفيق تم تحويله إلي النيابة.
وكيل النيابة : يا أبو توفيق هل أنت تعرضت للضرب ؟
أبو توفيق : نعم
وكيل النيابة : هل أنت معترف بأنك مدمن مخدرات ووجد في حوزتك حشيش ؟
أبو توفيق : هادا إلي لقوا عندي معرفهوش ولا عمري شفتوا وإنا عمري ما حششت وهادا كلوا افترا وظلم على عباد الله واعترافي الي ماضي عليه من كتر الضرب يا سيدي
"يحول أبو توفيق إلي السجن وتبدأ الزيارات ".
قطع :إم توفيق وأبو غازي بينتظروا على باب السجن
أبو غازي : شدي حيلك يا إم توفيق شده وبتزول
إم توفيق: هو أبو توفيق من يوم ما عرفكم هو شاف الخير إيش جايبك على الزيارة و إيش في خربان ديار تاني ما تحلوا عن أبو توفيق وبيكفي إلي جرالو .
قطع "أبو غازي مندوب أبو سليم يدخل لزيارة أبو توفيق وهو يحمل طعام وفاكهة وملابس
أبو غازي : أبو توفيق سلام من أبو سليم وهادي الأغراض بعتها إلك وبقولك اصمد يا أسد كلوا بثوابه .
أبو توفيق : أبو سليم وقفلي محامي ولا لأ وخليه يدفعلي الكفالة
أبو غازي : إنت بتعرف أبو سليم ما بقصرش مع أحبابه
قطع على إم توفيق أمام أبو توفيق وهي تحكي بصوت منخفض والدمعة بتنزل من عيونها""
إم توفيق : والله يا اخو يا أبو توفيق وقفت محامي شاطر وان شاءالله العرض الجاي على النيابة بتروح .
أبو توفيق : و مين دفع أتعاب المحامي و مين بدوا يدفع الكفالة ؟
إم توفيق : والله اخويا طلعت بارك الله فيه هو إلي دفع أجرة المحامي وتكفل بمبلغ الكفالة .
أبو توفيق : وأبو سليم ما أجا عليكم ؟
إم توفيق : لا شفنا أبو سليم ولا حد من عندو
أبو توفيق : وأبو غازي ما جاش عليكم ؟
إم توفيق : إيش هالعالم يلي ما بيجي من وراها غير الفقر والقرف
أبو توفيق : أشكري أخوكي طلعت والله أنا مش عارف أودي وجهي من أهلك وين.
إم توفيق : إن شاء الله بتطلع بالسلامة وكل الأحوال بتتغير
أبو توفيق : كيف يا إم توفيق إمدبرين حالكم في البيت ؟
إم توفيق : اخويا طلعت شايلنا وشايل الدار على راسه
.
قطع على بيت أبو توفيق
و الكل في البيت بينتظر وصول أبو توفيق بعد دفع طلعت الكفالة والإفراج عن أبو توفيق
أبو توفيق : يدخل إلي البيت ويبدأ أولاده بالتسليم عليه وتقبيله .
إم توفيق : الحمد لله على السلامة
أبو توفيق : طيب روحي شوفيلي لقمة آكلها ارم فيها عظمي بس بالله عليكي ما اتزني على راسي أنا زهقان روحي وبديش اسمع وإلا كلمة
إم توفيق : وال يا زلمة على إيش نافش ريشك وإلا إمفكر حالك طالع محرر كأنك سمير القنطار ما ناقص عليا غير أجيب قناة الجزيرة وإلا العربية وتلقيلك خطاب.
طلعت : هوني عليكي يا أختي يا إم توفيق شدة وزالت ، يا أبو توفيق هذه إن شاء الله آخر الأحزان ومن بعدها بتمشي الأمور على أحسن حال .
أبو توفيق : والله ما أنا عارف كيف بدي أشكرك يا اخو يا طلعت والله أنا قصرت كتير في حقكم وفي حق إم توفيق والأولاد.
طلعت : بعد أكم من يوم بعد ما تستريح يا أبو توفيق بدك تنزل الشغل معايا ونفتح صفحة جديدة وان شاء الله بيحي الخير على وجهك .
أبو توفيق : بس بدي أتريح شوية ومخي يروق وبعدين بفكر ما أنت عارف هل أكم من يوم يلي قضيتهم في السجن إيش عملوا فيا بس بالله عليك تخلي أختك إم توفيق تسكت صوت طقطقة ماكينة الخياطة إلي جبتها .
إم توفيق : والله يا خو بضيق فستان صباح لأختها فاطمة .
أبو توفيق : إلي بيسمعك بيفكرك جايبة الفستان من باريس ، معليكاش مخبا يا خو ياطلعت والله من سوق البالة اشترتو .
إم توفيق : والله يا اخو يا طلعت إني صرت أخيط لنسوان الحارة واعمل موديلات أبيعها في السوق.
طلعت : بعرف يا أختي وكمان ناوية تفتحي مشغل خياطة.
