خبط لزق -11-

استفتاء... لا استفتاء- تعديل.. لا تعديل.. واتهامات تكال للذين كانوا يطالبون بالتعديل... غباء... عجالة.. تلقي ملايين الدولارات من الخارج... إلخ...

وفجأة أعلن عن التعديل.. تعديل المادة 76 علي ما هو معروف.. والذين كانوا يطبلون للاستفتاء... أصبحوا يطلبون للتعديل...وهم علي استعداد أن يطبلوا مرة أخري للاستفتاء لو أن القيادة عادت إليه...

    وفتحت الأبواب إلي أوسع مدي للنفاق والمنافقين... إننا نعيش ـ في عهد فرعون المخلوع ـ عصر الإنسان المصري «المفرغ» من الداخل.. مصر المحروسة أصبحت «نفاقستان» ولا حول ولا قوة إلا بالله.

تعليقات

* بين المدرس وتلميذه:

-قل لي ياعبده: ما الفرق بين مجلس الشعب ومجلس الشوري?

-الأولاني رئيسه فتحي سرور.

والثاني رئيسه صفوت الشريف.

* بين صديقين:

- حكومة «نظيف» بتدعو للشفافية, طيب ليه مبيعملوش صناديق الانتخاب من الزجاج أو البلاستيك الشفاف?

- كمال الشاذلي قال: إن دي عملية مُكلفة.

- حلها بسيط: يفرضوا رسوم علي تذاكر الانتخاب.

* وبينهما:

- همه سموا الحزب الوطني حزب الأغلبية الساحقة ليه?

- لأنه «بيسحق» كل اللي يقف أمامه.

* وبينهما:

- بقولك إيه:مادام فيه حزب اسمه «الغد» تيجي نعمل حزب نسميه «حزب الأمس»

- آه ... والله فكرة.. طب حنكتب الهدف من إنشاء الحزب ده إيه?

- بسيطة: نكتب هدف الحزب أن ينطلق من الماضي «المبارك» ليعيش الشعب المصري حاضره «الشريف» في سعادة و«سرور» .

- الله!! آخر «جمال» وحياتك. عليك «نور».

* وبينهما:

- بيقولوا: إن أحزاب المعارضة أحزاب ورقية. الكلام ده صحيح?

- آه طبعًا, لأن ثبت أن همه السبب في أزمة «الورق» وارتفاع سعره.

* وبينهما:

- هي الدساتير بتشّحّت بدل الفلوس?

- لا.. إزاي?!

- أصل أنا شفت امبارح واحد بيخبط علي شقة جاري وبيقول: «دستور» يا سيادي.

* بين مسطولين:

- هي المادة 76 دي عايزين يعدلوها ليه?

- لازم عشان تمشي كويس.

- طب افرض مارضيتش تتعدل?

- خلاص.. يبقي «يعدلها ربنا».

* وبينهما:

- هي المادة 76 دي ماتت?

- لأ.. ليه?

- أصل ابني «عبده» قرأ في الجرنان أنهم كانوا بيصوتوا عليها امبارح.

* بين صديقين:

- الحكومة دي بتناقض نفسها.

- إزاي?

- بيقولوا: إنهم بيقبضوا علي أي «تنظيم سري» مع أنهم بيقولوا: لازم من «الاقتراع السري» فإيه رأيك?

- «كلام في سرك» أنا مش فاهم حاجة  .