عيد الغريب!
طارق أبو فراس الأحوازي
گالو عيد باچر بالله وين العيد ؟
أريد أحچيله ظيم العيد وإهمومه
عن لوعة الغربة أحچيله والهجران
مثل حزن السمه من يفگد إنجومه
مثل حزن الگمر من يفگد إضواه
مثل الشمس لو هجرت المنظومة
هيچ إنعيّد احنه إبّين حسرة او آه
مثل حزن المطر لو فارگ إغيومه
مثل حسرة شلب لو فارگ الماي
والفـلّاح عنـده الـغيـرة معدومـه
ضعنه او ضيّعينه او چلّبينه إبإيــد
أعمه إبليلة ظلمة او أرض ملغومه
مثل حال الورد بالصيف من ينداس
بجـدام الظــهر وإتذبّله إسـمـومه
مثل حال الطيور امكسره الجنحان
مسكينه حتى إمنل عشگ محرومه
مثل حال النخل من يمر بي تمّوز
صح واگف يظل بس عزته مهدومه
او مثل حال الصگر من هيبته اتضيع
وإيشوف إبصدر متكرخنه البومه
او مثل حال الأسد من يفگد النيبان
يظل إينيشن الواوي إعله بلعومه
هيچ إنعيّد إحنه إبّين دمعه او آه
شبه رضعان گبل أول أمس مفطومه
هيچ إنعيّد إحنه إبّين دمعه او آه
شبه حال اليتيم الحار بهدومه
