كهنة المعبد
( قصيدة من العهد البائد )
عبد القادر أمين عبد القادر- طنطا
عضو اتحاد كتاب مصر
طلعوا علينا ...
واحنا بنصلى ونعبد ربنا
قالوا انتوا مين ؟
قلنالهم احنا أهل مصر الطيبين
واحنا اللى بإدينا النجاة
قالوا البلد ده له إله
آمون بيشرح للعبيد شكل الحياة
هوه انتوا فاكرين المساجد ملككم ؟!
واللا الكنايس والمعابد والشوارع والبيوت من ورثكم ؟!
هوه انتوا بس المسلمين ؟
آدى الحققة قصاد عينيكم كلكم
الجنة والنار عندنا جوه الجراب
والعوجة راح ترجع شباب
وبالانتخاب ...
الشعب بايع والإله قرر خلاص
وزع صكوك العفو والغفران على كل اللى تاب
ودخل فى حزب المؤمنين
ندمان وناوى يكون حرامى مرتشى
ما هى دى شروط التوبة لو طلبك مشى
شخشخ وشخــــــــــ بط كلمتين
ان انت مش ناوى الصلاة
ولا مرة تدفع لليتيم مبلغ زكاة
وساعتها ...
يمكن يرحمك
وتكون فى ضل الحزب م العشرة الجناة
ترتيبنا ده ليوم الحساب
تكييف لمشتركى الفساد
يحميه من الشمس اللى فوق راس العباد
رد الغبى...
طب ليه هنصرف م الفلوس
ونبحتر اللى بنجمعه طول عمرنا ؟!
إيه رأيكم ....
ندى الأوامر للقمر يفضل وميسبش السما !!
والشمس برضه نقول لها متنوريش
أو نلغى أصلا م النتيجة عندنا يوم السؤال
لعيب درامز وشكله فاهم رقصته فوق الحبال
والنور قطع ...
معرفش تكمل خطوته
شخشخ وقال :
كان مالى بس ومال جمال .
